ຂ່າວໃຫມ່ວັນນີ້

ອາແຊັບ 7 ຊ່ອງທາງຮ່ວມມືດ້ານເສດຖະກິດ-ການຄ້າ

posted on October 6, 2012 by amphon

ກອງ​ປະ­ຊຸມ​ລັດ​ຖະ​ສະ­ພາອາ­ຊີ-ເອີ​ຣົບ ຄັ້ງ​ທີ 7 (ASEP 7) ເປີດ​ຂຶ້ນ​ຢ່າງ​ເປັນ​ທາງ​ການ​ໃນ​ວັນທີ 3 ຕຸ­ລາ 2012 ທີ່​ນະ­ຄອນ­ຫລວງວຽງ​ຈັນ, ໂດຍ​ມີ​ຄະ­ນະ​ຜູ້​ແທນ​ຂັ້ນ​ສູງຈາກ​ທັງ​ສອງ​ທະ­ວີບ​ຄືອາ­ຊີ ແລະ ເອີ​ຣົບ ເຂົ້າ​ຮ່ວມ​ທັງ​ຫມົດ 30 ຄະ­ນະ​ຈາກ 27 ປະ­ເທດ, 1 ລັດ​ຖະ​ສະ­ພາ​ເອີ​ຣົບ, 3 ອົງ​ການ­ຈັດ­ຕັ້ງ​ສາ­ກົນລວມ 250 ທ່ານ ເຊິ່ງ​ປະ­ເທດ​ເພື່ອນ​ມິດ​ໃນ​ອາ­ຊີ ແລະ ເອີ​ຣົບ​ຕ່າງ​ກໍ່​ມີ​ຄວາມ​ເຫັນ​ດີ​ເຫັນ ພ້ອມ​ໃນ​ການ​ເລືອກ​ເອົາ​ບັນ­ຫາ “ການເປັນ​ຄູ່​ຮ່ວມ​ລັດ​ຖະ​ສະ­ພາ​ອາ­ຊີ-ເອີ​ຣົບ ເພື່ອ​ການ​ພັດ­ທະ­ນາ​ແບບ​ຍືນ​ຍົງ” ມາ​ເປັນ​ປະ­ເດັນ​ປຶກ­ສາ​ຫາ­ລື​ກັນ, ຂະ­ນະ​ທີ່​ກອງ​ປະ­ຊຸມ​ປຶກ­ສາ​ຫາ­ລື​ເລ່ງແກ້ 3 ບັນ­ຫາ​ໃຫຍ່.

ພະ­ນະ​ທ່ານ ນາງ​ປາ­ນີ ຢາ​ທໍ່​ຕູ້ ປະທານ​ສະ­ພາ​ແຫ່ງ ສປປ ລາວ, ປະ­ທານກອງ​ປະ­ຊຸມ​ອາ​ແຊັບ ຄັ້ງ​ທີ 7, ກ່າວ ໃນ​ກອງ​ປະ­ຊຸມ​ບາງ​ຕອນ​ວ່າ: ໃນ​ສະພາບ​ລວມ​ຂອງ​ການ​ພັດ­ທະ­ນາ​ແບບ ຍືນ​ຍົງ​ພວມ​ກາຍ­ເປັນ​ທ່າ​ອຽງ​ລວມຂອງ​ບັນ­ດາ​ປະ­ຊາ​ຊາດ​ໃນ​ໂລກ, ການຮັດ​ແຫນ້ນ​ສາຍ​ພົວ­ພັນ ແລະ ການ​ເສີມ​ຂະ­ຫຍາຍ​ການ​ຮ່ວມ​ມື​ລະ­ຫວ່າງ​ສອງ​ທະ­ວີບອາ­ຊີ-ເອີ​ຣົບ ແມ່ນ​ຜົນ​ປະ­ໂຫຍດ ລວມ​ຂອງ​ທຸກ​ປະ­ເທດ; ການ​ຕົກ­ລົງເອົາ​ບັນ­ຫາ “ການ​ເປັນ​ຄູ່​ຮ່ວມ​ລັດ​ຖະສະ­ພາ​ອາ­ຊີ-ເອີ​ຣົບ ເພື່ອ​ການ​ພັດ­ທະ­ນາແບບ​ຍືນ​ຍົງ” ໃຫ້​ເປັນ​ຫົວ­ຂໍ້​ລວມ​ຂອງການ​ປຶກ­ສາ​ຫາ­ລື​ໃນ​ກອງ​ປະ­ຊຸມ​ອາແຊັບ​ຄັ້ງ​ທີ 7 ນີ້ ສະ­ແດງ​ໃຫ້​ເຫັນວ່າ​ ອາ​ແຊັບ​ໄດ້​ຫັນ​ໄປ​ທັນ​ກັບ​ຄວາມຮຽກ­ຮ້ອງ​ຕ້ອງ­ການ​ຂອງ​ຍຸກ​ສະໄຫມ ແລະ ຖື​ສຳ­ຄັນ​ຄວາມ​ມຸ່ງ​ມາດປາ­ຖະ­ຫນາ​ຂອງ​ບັນ­ດາ​ປະ­ຊາ​ຊາດ​ທີ່ຢາກ​ມີ​ຊີ­ວິດ​ການ​ເປັນ​ຢູ່​ທີ່​ດີ​ຂຶ້ນ​ບົນພື້ນ­ຖານ​ຄວາມ​ເຂົ້າ​ອົກ​ເຂົ້າ­ໃຈ​ເຊິ່ງກັນ ແລະ ກັນ ແລະ ຮ່ວມ​ມື​ກັນ​ເພື່ອບັນ­ລຸ​ຄວາມ​ສົມ­ບູນ​ພູນ​ສຸກ​ລວມ​ຂອງທົ່ວ​ໂລກ.

ໃນ​ສະ­ພາບ​ການ​ຂອງ​ໂລກ​ຍັງ​ສືບຕໍ່​ຜັນ​ແປ​ຢ່າງ​ສັບ­ສົນ ແລະ ຄາດ​ຄະເນ​ໄດ້​ຍາກ, ໄປ​ຄຽງ​ຄູ່​ກັບ​ກາ­ລະ​ໂອກາດ​ທີ່​ເປັນ​ເງື່ອນ­ໄຂ​ເອື້ອ​ອຳ­ນວຍໃຫ້­ການ​ພົວ­ພັນ​ຮ່ວມ​ມື​ລະ­ຫວ່າງ​ສອງທະ­ວີບ­ອາ­ຊີŒເອີ​ຣົບ ທີ່​ນັບ​ມື້​ໄດ້​ຮັບ​ການປັບ­ປຸງ​ດີ​ຂຶ້ນ​ໃນ​ຫລາຍ​ດ້ານ ແຕ່​ຍັງປະ​ເຊີນ​ຫນ້າ​ກັບ​ສິ່ງ​ທ້າ​ທາຍ​ຈຳ­ນວນຫນຶ່ງ​ເປັນ­ຕົ້ນ: ວິ​ກິດ​ການ​ທາງ​ດ້ານເສດ­ຖະ­ກິດ​ການ​ເງິນ; ການ​ປ່ຽນແປງ​ດິນ​ຟ້າ​ອາ­ກາດ​ຂອງ​ໂລກ​ທີ່​ພວມກະ­ທົບ​ຢ່າງ​ຮ້າຍ​ແຮງ​ຕໍ່​ກັບ​ຄວາມຫມັ້ນ­ຄົງ​ທາງ​ດ້ານ​ສະ­ບຽງ​ອາ­ຫານ; ຄວາມ​ຫລຸດ​ໂຕນ​ກັນ​ຂອງ​ລະ­ດັບການ​ພັດ­ທະ­ນາ​ລະ­ຫວ່າງ​ບັນ­ດາ​ປະເທດ​ທີ່​ພັດ­ທະ­ນາ​ແລ້ວ ແລະ ກຳ­ລັງພັດ­ທະ­ນາ ແລະ ປະ­ເທດ​ດ້ອຍ​ພັດ​ທະນາ.

ຕໍ່​ສະ­ພາບ​ການ​ດັ່ງ­ກ່າວ​ນັ້ນ, ກອງປະ­ຊຸມ​ຄັ້ງ​ນີ້ ກໍ່​ຈະ​ປຶກ­ສາ​ຫາ­ລື​ເພື່ອຫາ​ທາງ​ອອກ​ຮ່ວມ​ກັນ​ຢ່າງ​ຮີບ​ດ່ວນ 3 ບັນ­ຫາ​ຄື: ການ​ຮັບ­ປະ­ກັນ​ຄວາມຫມັ້ນ ­ຄົງ​ດ້ານ​ສະ­ບຽງ​ອາ­ຫານ, ໃນ​ເງື່ອນ­ໄຂ​ຂອງ​ການ​ປ່ຽນ­ແປງ​ດິນຟ້າ​ອາ­ກາດ​ໃນ​ປະ­ຈຸ​ບັນ; ການ​ເພີ່ມທະ­ວີ​ການ​ຮ່ວມ​ມື​ອາ­ຊີ-ເອີ​ຣົບໃນການ​ຄຸ້ມ​ຄອງ​ຫນີ້ ສາ­ທາ­ລະ­ນະ ເພື່ອ​ການ​ພັດ​ທະນາ​ແບບ​ຍືນ​ຍົງ; ການ​ເປັນ​ຄູ່ຮ່ວມ​ອາ­ຊີ-ເອີ​ຣົບ ໃນ​ການ​ເພີ່ມທະ­ວີ​ການ​ມີ​ສ່ວນ​ຮ່ວມ​ຂອງ​ສັງ ຄົມ​ເພື່ອ​ຄຸ້ມ​ຄອງ​ໄພ­ພິ­ບັດ.

ພະ­ນະ​ທ່ານ ຣິກ ທໍຟ໌ ສະ​ມາ ຊິກ​ວຸດ​ທິ​ສະ­ພາ, ຫົວ­ຫນ້າ​ຄະນະ​ຜູ້​ແທນ​ປະ­ເທດ​ແບນ​ຊິກ, ເຈົ້າ­ພາບ​ຈັດ​ກອງ​ປະ­ຊຸມ​ການເປັນ​ຄູ່​ຮ່ວມ​ລັດ​ຖະ​ສະ­ພາ​ອາ­ຊີ-ເອີ​ຣົບຄັ້ງ​ທີ 6 ກ່າວ​ໃນ​ກອງ ປະ­ຊຸມ​ອາ​ແຊັບ 7 ວ່າ: ໃນ​ກອງປະ­ຊຸມ​ຄັ້ງ​ຜ່ານ​ມາ ອາ​ແຊັບ 6 ໄດ້​ສຸມ​ໃສ່​ປຶກ­ສາ​ຫາ­ລື​ບັນ­ຫາທາງ​ດ້ານ​ການ​ເງິນ, ໂຄງ​ປະກອບ​ທາງ​ດ້ານ​ເສດ­ຖະ­ກິດ​ຂອງໂລກ ແລະ ການ​ພັດ­ທະ­ນາ​ຄວາມກ້າວ­ຫນ້າ​ທາງ​ສັງ­ຄົມລວມ​ເຖິງບັນ­ຫາ​ສິ່ງ­ແວ­ດລ້ອມ.

ໃນ​ລະ­ຫວ່າງ​ກອງ​ປະ­ຊຸມ​ອາແຊັບ 6 ທີ່​ປະ­ຊຸມ​ໄດ້​ພ້ອມ​ກັນ​ປະກອບ​ຄຳ​ຄິດ​ເຫັນ ແລະ ເນັ້ນ​ເຂົ້າໄປ​ທີ່ການ​ພັດ­ທະ­ນາ​ບັນ­ຫາດ້ານ​ສຸ­ຂະ­ພາບ, ການ​ສຶກ​ສາ,ຄວາມ​ເປັນ​ນ້ຳ​ຫນຶ່ງ​ໃຈ​ດຽວ ແລະ ການ​ພັດ­ທະ­ນາ​ພາກ​ລັດໃນ​ແຕ່​ລະ​ປະ­ເທດ ແລະ ຮຽກຮ້ອງ​ໃຫ້​ສືບ­ຕໍ່​ເອົາ­ໃຈ­ໃສ່​ສົ່ງເສີມ​ບົດ­ບາດ​ຂອງ​ແມ່­ຍິງ​ໃນທົ່ວ​ສັງ­ຄົມ ເຊິ່ງ​ສຸດ​ທ້າຍ​ຜົນ​ສະຫລຸບ​ຄື​ໃຫ້​ແຕ່​ລະ​ປະ­ເທດ​ເອົາໃຈ​ໃສ່​ຕື່ມ​ໃນ​ຂອດ​ການ​ປະສານ​ງານ​ລະ­ຫວ່າງ​ລັດ​ຖະ​ສະພາຊຸກ­ຍູ້​ເຊິ່ງ​ກັນ ແລະ ກັນ​ເພື່ອພ້ອມ​ກັນ​ກ້າວ­ຫນ້າ.

ຢ່າງ­ໃດ​ກໍ່​ຕາມ ໃນ​ກອງ​ປະຊຸມ​ການ​ເປັນ​ຄູ່​ຮ່ວມ​ລັດ​ຖະ​ສະພາ​ອາ­ຊີ-ເອີ​ຣົບ​ຄັ້ງ​ນີ້ ແມ່ນ​ມີຄວາມ​ສຳ­ຄັນ​ຢ່າງ​ຍິ່ງ​ທີ່​ໄດ້​ຍົກເອົາ​ຫລາຍ​ປະ­ເດັນ​ສຳ­ຄັນ​ຂຶ້ນມາ​ປຶກ­ສາຫນຶ່ງ​ ໃນ​ນັ້ນ​ ຄື​ບັນ­ຫາ​ວິກິດ​ເສດ­ຖະ­ກິດ​ຢູ່​ເອີ​ຣົບ​ອັນ​ຈະເປັນ​ກະ­ແຈ​ດອກ​ສຳ­ຄັນ​ໃຫ້​ສອງທະ­ວີບ​ສາ­ມາດ​ຕໍ່­ສູ້​ກັບ​ໄພ​ດ້ານເສດ­ຖະ­ກິດ​ທີ່​ອາດ​ເກີດ​ຂຶ້ນ​ໃນ​ອະ­ນາ­ຄົດ​ໄດ້.

ກອງ​ປະ­ຊຸມ​ລັດ​ຖະ​ສະ­ພາອາ­ຊີ-ເອີ​ຣົບ ຄັ້ງ​ທີ 7 (ASEP7) ຊ່ອງ​ທາງ​ເພີ່ມ​ທະ­ວີ​ການ​ຮ່ວມ​ມືດ້ານ​ເສດ­ຖະ­ກິດ ແລະ ການ​ຄ້າ ເພື່ອຂຸດ​ຄົ້ນ​ຄວາມ​ອາດ​ສາ­ມາດ​ບົ່ມ​ຊ້ອນຂອງ​ກັນ ແລະ ກັນ ແນ­ໃສ່​ຄ້ຳ​ປະກັນ​ຄວາມ​ຫມັ້ນ­ຄົງ​ດ້ານ​ສະ­ບຽງອາ­ຫານ ເພື່ອ​ຕອບ​ສະ­ຫນອງ​ຄວາມຕ້ອງ­ການ​ອັນ​ເປັນ​ພື້ນ­ຖານ​ນຳ​ເອົາຄວາມ​ສົມ­ບູນ​ພູນ​ສຸກ ແລະ ຍົກ​ລະດັບ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນສອງ​ທະ­ວີບ​ໃຫ້​ດີ​ຂຶ້ນ.

ພະ­ນະ​ທ່ານ ທອງ​ສິງ ທຳ​ມະວົງ ນາ­ຍົກ­ລັດ­ຖະ­ມົນ­ຕີ​ແຫ່ງ ສປປ ລາວ, ປະ­ທານ​ກອງ​ປະ­ຊຸມ​ສຸດຍອດ​ອາ­ຊີ-ເອີ​ຣົບ ຄັ້ງ​ທີ 9 ກ່າວ​ໃນກອງ​ປະ­ຊຸມ​ອາ​ແຊັບ ຄັ້ງ​ທີ 7 ວ່າ: ລັດ​ຖະ​ສະ­ພາ​ອາ​ແຊັບ​ເປັນ​ຕົວແທນ​ແຫ່ງ​ສິດ ແລະ ຜົນ​ປະ­ໂຫຍດຂອງ​ປະ­ຊາ­ຊົນ​ອາ­ຊີ ແລະ ເອີ​ຣົບ ເຊິ່ງ​ປະ­ຊາ­ຊົນ​ສອງ​ທະ­ວີບ​ລ້ວນ ແຕ່​ມີ​ຄວາມ​ປາ­ຖະ­ຫນາ​ໃນ​ການຢູ່​ຮ່ວມ​ກັນ​ດ້ວຍ​ໄມ­ຕີ​ຈິດ​ມິດ​ຕະ ພາບ, ເພີ່ມ​ທະ­ວີ​ການ​ຊ່ວຍ­ເຫລືອ ເຊິ່ງ​ກັນ ແລະ ກັນ ເພື່ອ​ການ​ພັດທະ​ນາ​ໄປ​ສູ່​ຄວາມ​ຈະ­ເລີນ​ຮຸ່ງ­ເຮືອງຂອງ​ພວກ​ເຮົາ.

ດັ່ງ­ນັ້ນ, ລັດ­ຖະ­ບານ​ແຫ່ງ ສປປ ລາວ ເຫັນ​ວ່າ​ກອງ​ປະ­ຊຸມ​ອາ​ແຊັບຄັ້ງ​ນີ້ ຄວນ​ສຸມ​ໃສ່​ຫາ­ລື​ປະ­ເດັນຕ່າງໆ​ທີ່​ປະ­ຊາ­ຊົນ​ສອງ​ທະ­ວີບ​ພວມຄອງ​ຄອຍ. ໃນ​ນັ້ນ ຄວນ​ຄົ້ນ­ຄວ້າຊອກ​ຫາ​ຊ່ອງ​ທາງ​ເພີ່ມ​ທະ­ວີ​ການຮ່ວມ​ມື​ດ້ານ​ເສດ­ຖະ­ກິດ ແລະ ການຄ້າ ແນ­ໃສ່​ຂຸດ​ຄົ້ນ​ຄວາມ​ອາດ​ສາ­ມາດບົ່ມ​ຊ້ອນ ຂອງ​ກັນ ແລະ ກັນ; ພ້ອມ​ນັ້ນ ຕ້ອງ​ຊຸກ­ຍູ້​ຢ່າງ​ແຂງ­ແຮງ​ການ​ຮ່ວມມື​ໃນ​ຂົງ­ເຂດ​ການ​ຜະ­ລິດ​ກະ­ສິ­ກຳ ໂດຍ​ມີ​ໂຄງ­ການ​ຄ້ຳ­ປະ­ກັນ​ຄວາມຫມັ້ນ­ຄົງ​ທາງ​ດ້ານ​ສະ­ບຽງ​ອາຫານ ເຊິ່ງ​ມີ​ຄວາມ​ຈຳ­ເປັນ​ທີ່​ສຸດ ເພາະ​ປະ­ຈຸ​ບັນ​ສະ­ພາບ​ດິນ​ຟ້າ​ອາກາດ​ມີ​ການ​ປ່ຽນ­ແປງ​ຜິດ​ປົກ­ກະ­ຕິ ຖ້າ​ບໍ່​ມີ​ມາດ​ຕະ­ການ​ຮ່ວມ​ກັນ​ທີ່​ແທດ­ເຫມາະ​ກັບຄວາມ​ເປັນ​ຈິງ​ປະ­ຊາ­ຊົນ​ຂອງພວກ​ເຮົາ​ກໍ່​ຈະ​ປະ­ສົບ​ບັນ­ຫາຂາດ­ແຄນ​ສະ­ບຽງ​ອາ­ຫານ ເຊິ່ງ​ເປັນ​ສາ­ເຫດ​ຕົ້ນ­ຕໍ​ອັນ​ຫນຶ່ງ​ແຫ່ງ​ການ​ກໍ່­ໃຫ້­ເກີດ​ມີ​ໄພ​ອັນ­ຕະ­ລາຍຂອງ​ຄວາມ​ບໍ່​ສະ­ຫງົບ.

ຄຽງ​ຄູ່​ກັນ​ນັ້ນ, ຍັງ​ມີ​ຄວາມຈຳ­ເປັນ​ຕ້ອງ​ຊອກ​ຫາ​ຊ່ອງ​ທາງ ເພື່ອ​ຕອບ​ສະ­ຫນອງ​ຄວາມ​ຮຽກຮ້ອງ​ຕ້ອງ­ການ​ອັນ​ເປັນ​ພື້ນ­ຖານຂອງ​ປະ­ຊາ­ຊົນ​ເປັນ­ຕົ້ນ: ການຍົກ​ລະ­ດັບ​ຊີ­ວິດ​ການ​ເປັນ​ຢູ່ ແລະ ຄວາມ​ຫມັ້ນ­ຄົງ​ໃຫ້​ດີ​ຂຶ້ນ, ກ້າວໄປ​ສູ່​ການ​ນຳ​ເອົາ​ຄວາມ​ສົມ­ບູນພູນ​ສຸກ​ມາ​ໃຫ້​ປະ­ຊາ­ຊົນ​ສອງ​ທະວີບ  ເພື່ອ​ບັນ­ລຸ​ເປົ້າ​ຫມາຍ​ດັ່ງ­ກ່າວຕ້ອງ​ທຸ່ມ​ເທ​ເຫື່ອ­ແຮງ, ສະ­ຕິ​ປັນ­ຍາ​ເພື່ອ​ເປັນ​ຮູບ​ແບບ​ໃນ​ການ​ພັດທະ​ນາ ແລະ ການ​ຮ່ວມ​ມື​ໃຫ້ສອດ­ຄ່ອງ​ກັບ​ຈຸດ​ພິ­ເສດ​ຂອງ​ຍຸກ ປະ­ຈຸ​ບັນ ເຊິ່ງ​ເປັນ​ຍຸກ​ແຫ່ງ​ການຮ່ວມ​ມື​ສາ­ກົນ.

ປະ­ຈຸ​ບັນ ໂລກ​ຂອງ​ພວກ​ເຮົາໄດ້​ຮັບ​ຜົນ​ກະ­ທົບ​ຈາກ​ວິ​ກິດ​ການເງິນ​ເຊິ່ງ​ທະ­ວີບ­ອາ­ຊີ ແລະ ເອີ​ຣົບຕົກ​ຢູ່​ໃນ​ສະ­ພາບ​ດັ່ງ­ກ່າວ, ສະນັ້ນ ກອງ​ປະ­ຊຸມ​ອາ​ແຊັບຄັ້ງ​ທີ 7 ນີ້ ຈະ​ໄດ້​ຄົ້ນ­ຄວ້າ​ຊອກ​ຮູບ​ແບບການ​ພັດທະ​ນາ​ທີ່​ຫມັ້ນ­ຄົງ​ຍືນ​ຍົງ ໂດຍ​ສົ່ງ­ເສີມ​ຮ່ວມ​ມື​ຕ່າງ​ຝ່າຍຕ່າງ​ໄດ້​ຮັບ​ຜົນ​ປະ­ໂຫຍດ, ຮັບປະ­ກັນ​ຄວາມ​ສົມ​ດຸນ ແລະ ຕິດພັນ​ກັນ​ຢ່າງ​ກົມ­ກຽວ​ລະ­ຫວ່າງການ​ພັດ­ທະ­ນາ​ເສດ­ຖະ­ກິດ-ສັງຄົມ​ກັບ​ການ​ປົກ​ປັກ​ຮັກ­ສາ​ສິ່ງແວດ​ລ້ອມ ສຸມ​ໃສ່​ຊ່ວຍ­ເຫລືອກັນ ເພື່ອ​ບັນ­ລຸ​ເປົ້າ​ຫມາຍ​ສະ­ຫັດສະ​ວັດ​ດ້ານ​ການ​ພັດ­ທະ­ນາ​ໃນ​ປີ 2015.

ທ່ານ​ນາ­ຍົກ­ລັດ­ຖະ­ມົນ­ຕີ​ແຫ່ງ ສປປ ລາວ ກ່າວ​ອີ​ກວ່າ: ໃນ ເດືອນ​ພະ­ຈິກ 2012 ທີ່​ຈະ​ມາເຖິງ​ນີ້ ສປປ ລາວ ຈະ​ເປັນ​ເຈົ້າພາບ​ຈັດ​ກອງ​ປະ­ຊຸມ​ສຸດ​ຍອດ​ອາຊີ-ເອີ​ຣົບ ຄັ້ງ​ທີ 9 ທີ່​ນະ­ຄອນຫລວງ​ວຽງ​ຈັນ ປະ­ຈຸ​ບັນ ດ້ວຍຄວາມ​ຮັບ­ຜິດ­ຊອບ​ຂອງ​ຕົນ, ການ​ຊ່ວຍ­ເຫລືອ, ການ​ຮ່ວມ​ມືຂອງ​ບັນ­ດາ​ປະ­ເທດ​ເພື່ອນ​ມິດ, ການ​ກະ­ກຽມ​ດ້ານ​ຕ່າງໆ​ໄດ້​ສຳເລັດ​ໂດຍ​ພື້ນ­ຖານ​ແລ້ວ ແລະ ເຊື່ອ​ວ່າ​ຈະ​ໄດ້​ຮັບ​ການ​ສະ­ຫນັບສະ​ຫນູນ​ຮ່ວມ​ມື​ຈາກ​ບັນ­ດາ​ປະເທດ​ສະ­ມາ­ຊິກ​ອາ​ເຊັມ​ກໍ່​ຄື​ລັດຖະ​ສະ­ພາ​ອາ­ຊີ-ເອີ​ຣົບ ເພື່ອ​ຮັບປະ­ກັນ​ໃຫ້​ກອງ​ປະ­ຊຸມ​ທີ່​ສຳ­ຄັນທັງ​ສອງ​ນີ້ ໂດຍ​ການ​ເປັນ​ເຈົ້າພາບ​ຂອງ ສປປ ລາວ ໄດ້​ຮັບ​ຜົນສຳ­ເລັດ​ຕາມ​ຈຸດ­ປະ­ສົງ ແລະ ຄາດ­ຫມາຍ, ປະ­ກອບ­ສ່ວນ​ຊຸກຍູ້​ສົ່ງ­ເສີມ​ການ​ຮ່ວມ​ມື​ລະ­ຫວ່າງສອງ​ທະ­ວີບ​ກ້າວ​ຂຶ້ນ​ຢ່າງ​ບໍ່​ຢຸດຢັ້ງ, ນຳ​ຜົນ​ປະ­ໂຫຍດ ແລະ ຄວາມ​ສົມ­ບູນ​ພູນ​ສຸກ​ມາ­ສູ່​ປະ­ຊາຊົນ​ສອງ​ທະ­ວີບ ທັງ​ເປັນ​ການ​ປະກອບ​ສ່ວນ​ສຳ­ຄັນ​ເຂົ້າ​ໃນ​ການຮ່ວມ​ມື​ເພື່ອ​ການ​ພັດ­ທະ­ນາ ແລະ ຄວາມ​ຈະ­ເລີນ​ຮັ່ງ­ມີ​ຂອງ​ໂລກ.

ใส่ความเห็น

Seuth

Please log in using one of these methods to post your comment:

WordPress.com Logo

You are commenting using your WordPress.com account. Log Out / เปลี่ยนแปลง )

Twitter picture

You are commenting using your Twitter account. Log Out / เปลี่ยนแปลง )

Facebook photo

You are commenting using your Facebook account. Log Out / เปลี่ยนแปลง )

Google+ photo

You are commenting using your Google+ account. Log Out / เปลี่ยนแปลง )

Connecting to %s

สร้างเว็บไซต์หรือบล็อกฟรีที่ WordPress.com.

%d bloggers like this: